ថ្ងៃនេះជាខួបកំណើត ផ្លូវការរបស់សម្តេចតេជោ
04-April-2016 | ដោយ មែន កំសត់
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី៤ ខែមេសានេះបានសរសេរបង្ហោះក្នុងFacebookថាថ្ងៃនេះជាខួបកំណើត មិនពិតរបស់សម្តេច តែជាថ្ងៃខួបកំណើតផ្លូវការ ហើយក៏ជាថ្ងៃខួបលើកទី៤៦ឆ្នាំ (៤ មេសា១៩៧០-៤ មេសា ២០១៦) ដែលសម្តេចបានលះបង់ការសិក្សា ចូលបម្រើកងទ័ព តាមការអំពាវនាវរបស់សម្តេចព្រះនរោត្តម សីហនុ ដើម្បីតស៊ូប្រឆាំងរដ្ឋប្រហារខុសច្បាប់និងការឈ្លានពានរបស់បរទេស។
សម្តេចបានសរសេរដូច្នេះថា"ថ្ងៃនេះ ជាថ្ងៃខួបកំណើតមិនពិត តែជាថ្ងៃខួបកំណើតផ្លូវការរបស់ខ្ញុំ។ អ្វីដែលសំខាន់សំរាប់ខ្ញុំនាថ្ងៃ ៤មេសានេះ គឺជាថ្ងៃដែលខ្ញុំបានសំរេចចិត្តដើរតាមការអំពាវនាវរបស់ សម្តេចព្រះនរោត្តម សីហនុ ដើម្បីតស៊ូប្រឆាំងពួកធ្វើរដ្ឋប្រហារខុសច្បាប់ និងការឈ្លានពានរបស់បរទេស។
៥ ឆ្នាំមុន ខ្ញុំបែកពីឪពុក ម្តាយ បងប្អូនដោយដៃកាន់សៀវភៅ ប៊ិច ដើម្បីការរៀនសូត្រ តែលើកនេះខ្ញុំចាកចេញទៅជាមួយការតាំងចិត្តកាន់អាវុធដើម្បីធ្វើ ការប្រយុទ្ធ។ ថ្ងៃនេះ គឺជាខួបលើកទី៤៦ឆ្នាំនៃការផ្ទេរជីវភាពពីយុវសិស្សម្នាក់មកជា យុទ្ធជនម្នាក់ (៤ មេសា១៩៧០-៤ មេសា ២០១៦)។ ពេលនោះខ្ញុំទើបមានអាយុ១៨ឆ្នាំ ខ្ញុំគួរតែមានឱកាសបន្តការសិក្សា ឬរស់នៅជាមួយក្រុមគ្រួសារ តែរដ្ឋប្រហារខុសច្បាប់ និងការឈ្លានពានរបស់បរទេសបានដាក់ប្រជាជនកម្ពុជា ទៅជាចំណាប់ខ្មាំងនៃសង្គ្រាម ដែលគ្មានផ្លូវទី៣សំរាប់ការជ្រើសរើសនោះឡើយ"។
សម្តេចបាន បន្តថា៖"តើជាកំហុសអ្នកណាដែលធ្វើឱ្យកម្ពុជាមានសង្គ្រាម និងបន្ទាប់មកមានរបប ប៉ុល ពត? កំហុសរបស់អ្នកនយោបាយមួយនាក់ឬមួយក្រុមនាពេលនោះបានធ្វើឱ្យកម្ពុជា ចាកចេញពីសន្តិភាពមកកាន់សង្គ្រាមវិនាសកម្ម និងបន្ទាប់មកកើតមានរបបប្រល័យពូជសាសន៍ប៉ុលពត។យើងត្រូវរួមគ្នារក្សាសន្តិភាពដែលយើងរកបានដោយលំបាកនេះឱ្យបានគង់វង្សតរៀងទៅ"៕
ចំនួនអ្នកទស្សនា
- ថ្ងៃនេះ901
- ម្សិលមិញ5781
- សប្តាហ៍នេះ6691
- ខែនេះ201291
- ឆ្នាំនេះ201291
- សរុប20643747